Kanuha, Joseph Kawai‘elelani "Big Joe" Sr.: Nā Hali‘a Aloha

Author: 
Kaho’okahi Kanuha

 

Joseph Kawai’elelani "Big Joe" Kanuha, Sr.
 
Photo courtesy of Kaho’okahi Kanuha.

Kumu Kalehua Lima and her haumāna of Ka Papa Mō‘aukala have again compiled a priceless collection of mo‘olelo hulu kūpuna and shared them with Ka‘iwakīloumoku. Ka Papa Mō‘aukala is unique in that it is a Hawaiian History class taught entirely in Hawaiian language - the mo‘olelo shared by these haumāna preserve not only the hali‘a aloha of their own kūpuna, but the ‘ōlelo ‘ōiwi o ka pae ‘āina nei. E ho‘onanea mai...


Welina mai kakou e ka poe oiwi o ka pae aina nei mai ka aina o ka ua Kanilehua a hiki loa aku i ka la welo iho i ka mole olu o Lehua. Ua mohala aela na liko o ka wahine hele la o Kaiona. Me ka haaheo a me ka haahaa no makou i lilo ai i poe kakau moolelo kupuna. Lana ko makou manao i ka hoohanohano ana i na hulu kupuna na lakou i hele mua no laila he wahi leo mahalo piha keia. Nenee mai a hoonanea no hoi kou heluhelu ana i na moolelo kupuna i kakau ia nei. O au no me na haumana i ao maikai ia e na Kumu ike Hawaii o Kapalama nei, ka papa Moaukala Hawaii, Haule Lau 2006.
-Kalehua Lima


 

Wahi a ku’u kupunawahine, "He kanaka kuikawā loa kou kupuna kāne.  He mea ‘ōko’a nō ho’i ‘o ia."  ‘O Clement Kahikina Kanuha lāua ‘o Rose Kumuhone (Kanuha) nā mākua ‘o "Big Joe."  Ua hānau ‘ia ‘o ia i ka lā 23 ‘o Kēkēmapa i ka makahiki 1924 ma Kailua-Kona, Hawai’i.  Ua male ‘o ia iā Henrietta Soares a ua noho pū lāua a hānau ‘ia maila ‘o Joseph Kawai’elelani "Baby Joe" Kanuha lāua ‘o Jolyne Kehaulani Kanuha (Carvalho). 

Ua hana ‘o Big Joe no ka hui mokulele ‘o Aloha Airlines.  I nā lā a pau, ma kona wā ho’omaha awakea, hele ‘o ia i kahakai a lu’u no ka i’a.  Ua ho’opū’iwa ‘o ia i kona po’e hoa i nā lā a pau no ka mea, hala ka hapalua hola wale nō a ua loa’a iā ia nā i’a he nui, ‘elua a i ‘ole ‘ekolu stringer.  A ‘o ka mea kūikawā o kona lu’u ‘ana i kai, ua kāpili ‘o ia i kona makaaniani lu’u kai pono’ī.  ‘A’ole ‘o ia i kū’ai mai ka hale kū’ai mai.  ‘O ka ‘ohe me ka laho lio nā mea i hana ‘ia ai no kona makaaniani lu’u kai.  ‘A’ole ‘o ia i ho’ohana i ka paipu hanu, a ‘a’ole ‘o ia i ho’ohana i ka ‘ōkoholua niho ‘ekolu, akā ua ho’ohana ‘o ia i ka mea i loa‘a i ka po’e Hawai’i.  Ua akamai loa ‘o ia i nā ‘ano hana like ‘ole o ka lawai’a.  Wahi a kāna keiki hanauna, ‘o Jerome Kanuha, "He keu nō ‘o ia a ke kanaka lawai‘a ma ka ‘ohana Kanuha.  A wahi a Pocho Kanuha," ’A’ole i loa’a iā mākou ke kālā he nui, akā ‘a’ole ia he mea ko’iko’i i kēlā manawa, no ka mea, ua ho’i mai ‘o Big Joe i kēlā me kēia pō me ka i’a i lawa pono ka ‘ai ‘ana a kona ‘ohana holo’oko’a, ma kahi o nā kānaka he 30. 

Ua aloha ko’u kupunakāne i ka ho’okani kīkā ‘ana, akā ua makemake ‘o ia e ho’onui i ka leo o kona kīkā.  No laila, ki’i akula ‘o ia i kaula, e like me ke kaula no ka lawai’a ‘ana, a ua nāki’i ‘o ia i kekahi po‘o o ke kaula i kona kīkā.  Ma hope iho, ki’i ‘o ia i ka po‘o ‘ē a’e o ke kaula a nāki’i i kekahi kini Vienna sausage.  Ma muli o kēia hana, ua ho’onui ‘ia ke kani ‘ana o ke kīkā, me he pahu ho’onui leo lā!.  Na ko’u papa i ha’i mai iā’u i kēia mo’olelo, a hiki ia’u ke kuhi i ke akamai o ku’u kupunakāne.  Ua no‘eau loa nō ho’i ‘o ia. 

‘A’ole au i ‘ike maka i ku’u kupunakāne, no ka mea ua hala ‘o ia i ka lā 26 ‘o Nowemapa i ka makahiki 1971.  ‘O ia ka Lā Ho’omaika’i, ua hala ‘o ia i kekahi ulia ka’a i kona ho’i ‘ana i ka hale ma hope o kekahi pā’ina ‘ohana.  I ia manawa, he keiki wale nō ko‘u pāpā, piha iā ia nā makahiki he 13.  Makemake nui au e ‘ike a launa pū i ko’u kupunakāne, akā no kēia manawa, pono au e ho’olohe wale i nā mo’olelo e pili ana iā ia, a pono au e kali no ka manawa pono o ko kāua hui ‘ana.